"കാലമിനിയുമുരുളും വിഷു വരുംവര്ഷം വരും തിരുവോണം വരും
പിന്നെയോരോ തളിരിലും പൂ വരും കായ് വരും...."
ഉവ്വ...കാലമിനിയുമെത്ര ഉരുണ്ടാലും യുസിയിനിയുമെത്ര ഓണമുണ്ടാലും ഇവിടെയൊരാള്‍ക്ക് ഓരോ തളിരിലും പൂവും വരില്ല കായും വരില്ല. 1925 ല്‍ തുടങ്ങിയ നില്പാണ്. ആ കാലത്ത് ഒട്ടുമാവ് എന്ന 'മുണ്ടനെ' ബ്രിട്ടീഷുകാരോ നാട്ടുകാരോ കണ്ടുപിടിച്ചിട്ടുണ്ടോ എന്നറിയില്ല. എന്തായാലും സംഭവം വളര്‍ന്നുവന്നപ്പോ (ഈ വളര്‍ച്ച എന്ന് പറേണ സംഗതി ഐന്‍സ്ററീന്‍ പറഞ്ഞ മാതിരി ആപേക്ഷികമാണെന്ന് ഈ മാവ് കണ്ടാല്‍ തിരിയും) ഒട്ടുമാവോളമേ എത്തിയുള്ളൂ.
ദോഷം പറയരുതല്ലോ. ഒന്നരാടം വര്‍ഷം കൂടുമ്പോള്‍ പഴയതൊക്കെ മറന്ന് ഇദ്ദേഹം കൃത്യമായി പൂവിടും. ഗാന്ധിക്ക് നിരക്കുന്നതും നിരക്കാത്തതുമായ ഒരുപാടു ബന്ധങ്ങള്‍ ദിവസവും വളര്ന്നു പുഷ്പിക്കുന്ന ഒരു കലാലത്തിനു കൂട്ട് നില്‍ക്കുമ്പോള്‍ ഹൃദയമുള്ള എതോരുവനാണ് ഒന്നു പൂത്തുലയാത്തത്...? പക്ഷെ, സങ്ങതിയങ്ങനെ കൊഴുത്തുവരുമ്പോഴേക്കും 35 m.m ഫ്ലാഷ്ബാക്കില്‍ സ്വാതന്ത്ര്യസമരം തെളിയും. നിസ്സഹകരണപ്രസ്ഥാനത്തിനായി മനസ്സു ദാഹിക്കും. നിരാഹാരത്തിനായി ശരീരം കൊതിക്കും. അങ്ങനെ സുന്ദരമായ ആ ഗര്‍ഭവും അലസിപ്പോകും!
അമിതാഭ് ബച്ചന്‍ പറഞ്ഞ പോലെ 'രിശ്തെ മേം ഹം തുമാരെ ബാപ് ഹോതാ ഹേ' ആണെന്കിലും കുട്ടികളുമായുള്ള 'ടേംസ്' വച്ചു നോക്കുമ്പോള്‍ ഗാന്ധി നട്ട മാവ് സഹോദരനാണ്, എന്തും പറയാവുന്ന കൂട്ടുകാരനാണ്, യുസിയില് കിട്ടാവുന്ന ഏറ്റവും നല്ല പന്കാളിയാണ്. മനസ്സില്‍ ഇച്ചിരി ഗൌരവമുന്ടെന്കിലും ശരീരം കൊണ്ടു പ്രേം നസീര്‍; നിത്യഹരിതനായകന്‍. നായികമാര്‍ ഒരുപാട്‌ കടന്നുപോയി. തലയില് വല്യ വല്യ ഉണ്ടകള്‍ ഉരുട്ടിവച്ച ലോക്കല് ഷീലമാര്‍ തുടങ്ങി സാക്ഷാല്‍ മീരാ ജാസ്മിന്‍ വരെ (സംഗതി സത്യമാണ്. മീരാ ജാസ്മിന്‍ കുറച്ചു കാലം യുസിയില് പഠിച്ചിട്ടുണ്ട്). ഇദ്ദേഹത്തിന് അപ്പ്രോം ഇപ്പ്രോം
താങ്ങായി നില്ക്കാന്‍ ഇന്നും പുത്തന്‍ നായികമാര്‍ വന്നുകൊണ്ടിരിക്കുന്നു.
ഇതൊക്കെ കണ്ട്‌ അസൂയ മൂത്ത വേണു നാഗവള്ളിമാര്‍ കുറച്ചപ്പുറം മാറിനിന്ന് നൈരാശ്യത്തിന്‍റെ വരികള്‍ കുറിക്കുന്നുണ്ടാകും.
കച്ചേരിമാളിക മാത്രമല്ല, അതിന് മുമ്പിലുള്ള ഈ മാവും ചരിത്രസ്മാരകം തന്നെ. ഗാന്ധിജി കേരളത്തിലെ ഏതെങ്കിലും ഒരു കലാലയത്തില് മാവ് നടുന്നത് നടാടെയാണ്. വെറുതെ മാവോരെണ്ണം നടുക മാത്രമല്ല, യുസിയിലെ സന്ദര്‍ശകഡയറിയില്‍ ഇങ്ങനെയൊരു വരി കുറിച്ചുവയ്ക്കുകയും ചെയ്തു; "Delighted with the ideal situation..."
പഠിച്ചു പോകുന്നവര്‍ക്കുള്ള യുസിയുടെ ഒസ്യത്താണ് ഈ വരികള്‍. ആ മഹാത്മാവ് (യുസിയില് മാവ് നട്ട ശേഷമാണത്രേ ടാഗോര്‍ അദ്ദേഹത്തെ 'മഹാത്മാവ്' എന്ന് വിളിച്ചത്) യുസിയില് നട്ട മാവിന്‍റെയും വാക്കുകളുടെയും സുഗന്ധം പടിയിറങ്ങുന്ന ഓരോരുത്തരും കൃത്യമായി വീതിച്ചെടുക്കുന്നു.
